esischeso.ch

Hütt über de Mittag hani en Spaziergang gmacht. I dr Innestadt bini vonere Frau mit eme Zedel „aagsproche“ worde. De Zedel isch e Underschrifteliischte für e Spendesammlig für Taubstummi xii, d’Sammlerin isch, oh Wunder, ebefalls Taubstumm. Im wüsse, das da meischt öppis fuul isch, hani uf mini unwiderstehlichi art mis desinteresse kundtue. Nachdem sie denn wiiterzottlet isch hani plötzli e gueti Idee gha. „Hey, wart schnäll!“ hani gruefe, nachdem sie ca. 10m wiit wäg xii isch. Und siehe da, sie dräit sich um und luegd mi mit emene lächle ah und wot bi mir go gäld abkassiere. Wo sie aber sälber gmerkt het, dass sie ja eigetli Taubstumm isch und mich ja gar nöd hetti dörfe ghöre, isch si rächt schnäll wiitergloffe, so geht das! esischeso!

de letschti blog iitrag hani eigetli uf mim handy gschriibe und per wp-app postet, leider isch das gründlich id hose, mal luege öb z’update öppis bracht het…

also, es isch eso, ich chaufe mini sbb-billet übers handy mit de sbb app. am morge bini i der regel am news läse uf mim smartphone. letschti chunnt de kondi und ich chum voll in stress. news siite zue mache, sbb app ufmache, billet sueche, azeige, zeige…zeige? de kondi isch scho weg, wahrschinli het er dänggt: „das mannli tuet so nüüt dergliiche, der het siis billet sicher scho zeiged…“. öb das wohl au funktioniert, wänn ich dänn mal kes billet han? vermuetli nöd, dänn häsch mal keis, dänn wot de kondi sicher eis, esischeso!

da seit de barkeeper er sig italiener, in da herz mann. und wiiter „ich han en schwiizer pass, aber was in da herz isch oder da inne flüüsst“, er zeigt uf siini adere am handglängg, „weisch ich chum vo sizilie, du weisch was das heisst“. en richtige, en autentische also. ich bestelle en negroni. das „oni“ am schluss heisst nöd öppe „ohni“, aber uf die akademischi diskussion hani mi scho gar nöd wellä iloh. er seit: „das hani nöd“.

frage 1: „häsch gin?“
antwort 1: „ja klar!“

frage 2: „häsch campari?“
antwort 2: „aber sicher!“

frage 3: „häsch martini rosso?“
antwort 3: „sicuro!“

eigetli wär da demit s’wichtigste ja greglet, aber etz chunnts…

frage 4: „no echli iis dezue und dänn isches perfekt!“
antwort 4: „was iis? ich han ke iis, das gits da nöd!“

wie bitte, kei iis? etz kännt der nöd mal en negroni, und rüert ken finger um i de schwiiz zmittts im winter es paar iiswürfel z’organisiere. hinter mir staht e tüüfchüeltruhe und das manndli stellt mir en lauwarme negroni vor d’nase. isch au no muetig! sisch hert aber wahr, det woni hizie, det isches eso! e halb stund spöter imene schicke restaurant, mit michelinreife und milieupünkt hani s’gliiche spiili nomal gmacht. d’fragerundi lauft GENAU GLIICh wie vorher ab, bis uf die letschti frag, det trännt sich d’spreu vom weize, oder d’italiener mit vo dene ohni schwiizer pass, esischeso!

also ich glaub es isch definitiv ziiit worde e anders blatt z’abonierä. ich glaub ich ghöre definitiv nümm zum ziilpublikum vo dem blatt. mit de sehr usgeprägte rechte schlagsiite chönnti ja no läbä, ich bin zum glück en freie mänsch und cha mir ja sälber e meinig bilde. aber offebar het e beträchtlichi azahl vo de läser e blaseschwächi, süsch würme doch nöd wärbig vo inkontinänzbinde platziere, ischdocheso oder? anatomisch gformt, höchsti diskretion, geruchschutz odour control und NEU: drei suugstärchine nämmli level 1, level 2 und level 3. potzheieiei! da säichts wohl us allne löcher, esischeso!

di neue zvv-billetautomate sind eigetli super. aber mues es denn würggli so sii, dass zerscht s’billet und ersch dänn s’retourgäld usechunnt? bi de alte sbb-automate ischs nämmli genau umgekehrt, esischeso, aber wieso?

sälte hani es buech so ghasst und gliichziitig gliebt wie de schwarzi schwan vom nassim nicholas taleb. i vielne bereich wird mir das buech für immer verschlosse bliibe, sini philosophische asätz sind zum teil eifach z’höch für min bescheidene verstand. cool findi sini skeptischi haltig gegenüber de märkt und all dene fuzzis wo mit gschiide modell sicherheite vorgauklet. wo das herägfüert het hämmer doch ersch grad gmerkt. wieso mir inere immer komplexere wält immer weniger uussage über zuekunft söled chänne mache lüchtet mir wiitgehend i. über wiiti teil vom buech häni sache gläse und debi kes wort verstande und ich bin immer wieder gneigt xi, das buech id wüeschti z’schicke. aber de absoluti höhepunkt isch wortwörtlich im letschte absatz erfolgt. ich bräche wieder mal di goldigi reglä vo dem blog und zitiere: „Stellen SIe sich ein Staubkorn neben einem Planeten vor, der eine Milliarde Mal so gross ist wie die Erde. Dieses Staubkorn repräsentiert die Chance dafür, dass wir geboren werden, der riesige Planet die Chancen dagegen. Deshalb sollten Sie aufhören, sich den Tag durch Kleinigkeiten verderben zu lassen. Seien Sie nicht wie der Undankbare, der ein Schloss geschenkt bekam und sich über den Schimmel im Bad aufregte. Hören Sie auf, dem geschenkten Gaul ins Maul zu schauen – denken Sie daran, dass Sie ein Schwarzer Schwan sind.“ genau das hani mal amene kolleg gseit, der hat das gar nöd guet gfunde, het mir alles wüeschti an grind gworfe, ich läbi ja nöd und ich sig es uhuere a****loch. esisch…uf alli fäll es interessants buech, esischeso! 😉

…das hani dänckt woni de GEO (erschts vollständig gross gschribnigs wort i dem blog!) artikel über promenadologie gläse han. uf tüütsch heissts spaziergangswüsseschaft (zum blog), also es git tatsächlich e wüsseschaft, wo sich mit em spaziere beschäftigt, sache gits! aber i de ziit vo billigflüger, gps und internet gits wohl es bedürfnis use zfinde, was es bruucht um d’landschaft um eim ume würklich wahrzneh. bedänklich das es eim gar nöd bewusst isch, wie mir durs läbe hetzed, aber zum glück gits so gschiiidi lüüt wos eim vor auge füehred, esischeso!

…etz hani mir mal de web 2.0 browser „flock“ abezoge, di tüütsch version 2.0.3 het nöd wellä rächt funktioniere, d’facebook fründesliischte het eifach nöd wellä. da hani mir halt d’version 2.5 uf englisch inezoge. es schiint etz aber z’funktionierä. das da isch de erschti versuech, en blogiitrag über flock z’poste…mal luege öbs klappet…ischesächteso?

es isch 6:49 und mir nämed am tiefebrunne de 4-er richtig werdhölzli. es gaht genau 3 statione, und es isch scho die erschti billetkontrolle! mir händ zum glück es zoneabo und fraget de netti herr, wie lang s’zürcher tramschinenetz isch, aber er isch chli verläge wil er weiss es nöd…113.4 kilometer sinds, ohni strecki glattpark-flughafe…

07:05 Bahnhofquai/Hauptbahnhof, s’tram isch guet gfüllt, die meischte sind no echli verschlafe…

07:21 bling! schweiss uf de stirn! information der züri-linie! am sächsilüütte fahrt d’vbz…phiuuu! numal schwein gha! wievielmal werdemer das hüt no ghöre?

mir chämed pünktlich am 07:26 am werdhölzi a und fahret pünktlich am 07:30 mit em 4-er richtig escher-wyss platz. ich han echli es hüngerli! mr sitzd z’hinderscht im cobratram….es isch glaub s’erschti mal, das ich am werdhölzli gsii bin, nüechtern betrachtet isch s’andere ändi vom 4-er scho echli schöner, see vs. klärwerk, en unfaire vergliich…etz gahts z’erscht mal zrugg zum escher-wyss platz…

am 07:47 gahts pünktlich vom escher-wyss platz mit em 13-er richtig franketal wiiter, mir sitzed wieder imene cobra tram, d’lüüt sind etz alli ufem arbetswäg… die cobratram mached scho en cheibe mais, me verstaht chum siis eigete wort…

pünktlich am 08:01 chömemer in franketal a, s’tram fahrt grad wiiter sodass mir 8 minute ziit händ zum öppis zwüsched zänd z’becho. am 08:10 gahts mit em 13-er, wieder imene cobra ab zum albisgüetli. höngg isch e schöni gägend, me het e wunderbare blick über die ganzi stadt.

es isch etz 08:15 und de 13-er isch rächt voll, züri gaht also au erscht nachem 8-i go schaffe.

08:31 mir sind hüt zum zweite mal am Hauptbahnhof, s’tram isch immerno rächt voll…a de bahnhosstrasse wirds richtig äng! nüd mal mit mim netbook hani no aständig platz zum die ziile z’schriibe. es schiint so, dass bänker meh shchlaf bruched als anderi wörker…erscht am uetlihof stiiget alli uus und es hocket no öppe 5 lüüt im tram…wahrschinli schaffed de grossteil bi de cs…

am 08:50 chömed mer am albisgüetli a, di zweiti vollständigi tramlinie isch gschafft, sardinefeeling ab de bahnhofstrass. am 08:55 gahts mit em 13-er wiiter bis zum laubegg, s’tram isch leer.

09:05 laubegg, ich warte bis d’azeig vom tram uf d’zieldestination wächslet und denn fahrt das tram eifach ohni mich ab. mis müüsli isch im tram und ich nöd, schlagrahm! etz heissts: seckle. aber ei station wiiter unde schaffis doch no uf de 5-er, zum glück hets z’ersch no mües chere. d’reis gaht wie geplant wiiter, übrigens z’erschti mal imene tram2000.

09:18 und mir sind wieder am bellevue…es hät etz bedüütend weniger lüüt underwägs…richtig fluntere isch s’tram praktisch leer…

09:27 simmer pünktlich a de chile fluntere acho

09:29 de umstig uf de 6-er het problemlos klappet, da hets echli meh lüüt uf em tram, wahrschinli wägem hb, aber es leert sich schnell uf em weg in zoo, tja e nobli gägend de züriberg…

09:38 s’tram fahrt pünktlich vum zoo richtig bahnhof enge ab…und im tram träffed mir e bsunderi spezies a, es git si alsi würcklich, die züribergdamegsellschaft, tatsächlich!. und etz ab is uni-viertel, de studi groove macht sich langsam bemerkbar. viel ruckseck, wullesöckli und gschiidi lüüt…

09:58, mir sind wieder a de bahnhofstrass, s’tram isch guet gfüllt aber bedütend weniger wie im 13-er. und am rennweg stiigt d’züribergdamegsellschaft us.

10:05 simmer am bahnhof enge acho, en flüügende wächsel uf de 7-er passiert, meischterhaft, am 10:07 gahts ab richitg wollishofe…

10:15 chömed mer z’wollishofe a, ziit für nes kafi, am 10:30 gahts mit em 7-er wiiter richtig bahnhof stettbach, reiseziit 41 minute, han vergässe d’linietafele z’fötele, mischt! vil mitbecho hani nöd vo dere fahrt wil ich mir es spiderman comic inezoge han. etz grad simmer i de u-bahn vo züri zwüsched milchbuck und schamedingerplatz. langsam wirds chli hert uf dene sitz.

11:13 ankunft am bahnohf stettbach, das isch etz scho die 5-ti vollständigi linie gsi, in stettbach e riise baustell, mir bliibet im 7-er sitze uf em wäg zum schwamedingerplatz, abfahrt 11:19. ich wird immer schräg aglueget, wenn i mi sälber vor de tramlinietafele fötele, wieso ächt?

11:25 simmer am schwedingerplatz wo mir uf de 9-er richtig hirzebach umstiiged. mir hand scho profiniveau, de wächsel glingt üs fascht eso schnäll wie ne formel 1 boxestop…

am 11:31 chömed mer in hirzebach a, da gits vor allem fuessballplätz. etz gahts nomal in 47 quer dur di ganzi stadt is heuried, zwüsched de stossziite fahrt de 9-er nöd is triemli. chum abgfahre, wer und wer stiigt im altried i, es zürcher original: de hanf-ueli, er murmled irgend öppis wie: „nei er het nüüt meh gha aber öppis anders“ i siis bärtli aber wiit un breit isch ke sau…

das isch bis etz die längschti tramfahrt und mir fahred zum dritte mal am bellevue verbi, es isch etz 12:07 und es macht sich es grosses hüngerli bemerkbar. langsam aber sicher chömemer a üseri gränze aber mir händ nehmerqualitäte und lönd üs nöd entmuetige, schliesslich simmer ufeme guete wäg , d’helfti isch gschafft aber es sind no es paar langi streckine vor eus…

12:10 panik bricht uus, e schuelklass stiigt ii, wo isch miin i-pod, schhhhh, aber si schiined guet erzoge z’sii, bis etz..

und au bis am schluss wo sie am goldbrunneplatz uusgschtige sind, am heuried isch fertig. am 12:25 hämmer am heuried de 14-er is triemli gno.

abfahrt am triemli 12::32, mir undebräched eusi fahrt vorussichtlich am leueplatz um üüs für die bisherige asträngige z’belohne, s’ziel isch de golosone…

14:18 wiederufnahm vo üsere odysse ufem 14-er am leueplatz, aber zersch mal e kulinarische zwüschebricht. de golosone isch es italienischs restaurant im bankeviertel und es lohnt sich det de buch vollzschla. d’pizzas sind riesig und vorallem uhuere guet, mir händ für 2 persone rund 70 fränkli zahlt, für 2 pizzas mit menusalat, 4 bier und 2 ramazzottis, da chasch nüt sägä. etz simmer uf em wäg nach seebach, de 2-ti teil vo eusere odyssee.

14:42 simmer in seebach acho, hey, da hani mal gwohnt. d’pizzeria sorriso heisst etz pizzeria tomate, wer uf so en bescheuerte name chunnt? me merkt da scho de agglogroove, da werdet gängbängs mit 14-järige durezoge het me vor es paar mönet i de ziitig chäne läse, wenn de 8-er anstatt de 14-er uf seebach wür fahre wäreds denn gängbängs mit 8-järi…sorry… 😉

14:48, d’reis gaht wiiter mit em 14-er bis zum bahnhof oerlike oscht, d’dago bar, det wo de fraumünsterraub planed worde isch gits übrigens au nümm, aber nach dere krise und bi dene boni wo me hütt so usschüttet gits wahrschinli niened meh soviel z’hole und darum het me de lade dicht gmacht…

14:59 de 10-er richtig flughafe nämemer nur, damit mir au mit dere linie mindestens eimal gfahre sind. uf stadtgebiet gits kei einzigi haltestell wo de 10-er für sich allei in aspruch neh cha. hey! das weiss nöd jede! am glattpark stiiget mir uf de 11-er richtig auzelg um, da usse chunnsch dr vor wie ufem land. und da gits wahrschinli au es unikum vom ganze stadtgebiet: en bahnübergang mit schranke fürs tram.

15:10 de 11-er richtig rehalp isch eusi 2-letschti vollständigi strecki, liecht am ändi vom tunnel. leider hämmer ke glück gha und es het nöd es berner comnino tram uf eus gwarted, ich bin mir aber au nöd sicher öb das tram überhaupt no uf de zürcher schine fahrt. *isch es nöd, nur bis afangs april du tramfahrer du* [anm. d. red.]

15:30 mir sind grad am buecheggplatz duregfahre, müetere mit chinderwäge gits ets fascht i jedem tram, und langsam dörfti de scheiss echli schneller verbi gah mal ändli verbi sii, ich han langsam blatere am arsch. übrigens sind cobras härter als tram2000, das mues me wüsse!

so, d’strecki vom schaffhuserplatz bis zum bellevue hämmer hüt scho es paar mal gseh, irgendwie stiigt da echli die inneri agression, ich chas bald nümm gseh. d’yuppies sind nonig vom schaffe cho, isch ja klar wenns ersch am 8:30 afönd schaffe. am 16:02 isch d’endstation vom 11-er i de rehalp erreicht. am 16:07 gahts wieder zrugg richtig chrüüzplatz.

am chrüüzplatz wird am 16:20 de 15-er richtig klusplatz gno, und d’lüüt lueged etz no komischer weni mi vor de tafele fötele, was luegsch? wotsch miis fetli ha? d’haltestell englischviertelstrasse wird nur vom 15-er durfahre, deshalb isch die linie as absoluts muss, aber mir fahred si nur bis an klusplatz, wo mir am 16:24 achömed, zum letschte mal nämed mer da e linie und fahred demit quer dur die ganzi stadt.

am 16:26 nämemer s’letschte mal alauf, es langed langsam! de 3-er richtig albisriede isch die 3. letschti linie uf üserer f***-stadtrundfahrt, ich han langsam, moment, was langsam? ich han e hornhuut am arsch!

16:37 bling, information der züri linie, scho wieder schweiss uf de stirn, sechseläuten am bellevue, wieder schwein gha. bis etz schiiints überall rund z’laufe uf em zürcher tramnetz. etz am bahnhof stiiget wieder massehaft lüüt is tram iih, fiirabig, isch ja klar…

16:45 churzfrischtigi planänderig, am stauffacher stiigemer uf de achter richtig hardplatz um, anderi gägende anderi lüüt uf de strass, das merkt me vorallem zu de stossziite. vom hardplatz fahred mer zrugg bis an bahnhof selnau, und vo det wieder zrugg an stauffacher. am bahnhof selnau fahrt nur de 8-er dure, sis is iggstriimli importänt! darum simmer det schnäll go chäre.

also hämmer eusi fahrt mit dem 3-er underbroche, mir stiiget am stauffacher weider i und fahred nach albisriede zunere kollegin, es glesli wii go trinke. nach anderhalb stund ändlich die letschti etappe, zersch gönnemer eus aber en kebap vom new-point am albisriederplatz. und etz chunt s’2-er tram, ich han i mim läbe no nie so nes schöns 2-er tram gseh. de farbhof chunnt immer nöcher und circa am 19:30 hämmers gschafft! imene tag simmer alli tramhaltestelle vo züri abgfahre und händ jedi tramlinie mindestens eimal bruucht…so geil, und weisch was, es git wahrschinli niemer wo a dem tag alli tramhaltestelle gseh het, nur ich und mis müüsli, es-isch-e-so!