esischeso.ch

das isch für mich es richtigs winner z’morge. de silsergipfel (übrigens vom coop) chan i notfäll au dur en butterbrätzel ersetzt werde. das passiert bi mir meischtens wenn i mit em zug neumed here mues und es uf em wäg zum zug ken coop het. doch alles anderei als de big silsergipfel isch nüt anders als en kompromiss. isch de silsergipfel früsch us em ofe und no liecht warm und s’redbull iischalt, dänn isch es perfekt. de silsergipfel isch usse chnusperig und inne butterweich, de feini buttergschmack in kombination mit dr liechti wärmi git zum sprützige, prickelnde, iischalte redbull en schöne und belebende kontrascht. das tönt etz scho fascht wiene gastrokritik. vili rümpfed d’nase ob dere kombination, ich finds uhuere guet, esischeso!

…es git sicher besseri ideä als das. läck johnny. die lüüt, es schiint als wäri überall de notstand uusbroche. was mached die alli da? a de kasse sind gschätzti 2 millione lüüt am aschtah, und jede het läbensotwändigi ichäuf genau etz z’erledige. bi üüs isch es gribene emmentaler und es pack schincke wo absolut notwendig isch für üses z’nacht sind, mir händ aber nur grad 13 minute ziit und irgendwie liit unguets i de luft. de schlachtplan wo mir eus zrächtgleit händ gseht vor, dass mir vo zwei siite agriifed. ich stahn scho mal a de kasse a, währed s’andere überläbensteam, in form vo miner fründin, die objekte der begierde gaht go bsorge. es gaht zue wie im jungel! wenn mal wotsch gseh wie me sich uf ängschtem ruum im wäg cha stah, dann gang in coop am stadelhofe. uf alli fäll die taktik het sich sicher scho mal glohnt, wil hinder mir stönds scho bis zur sechsilüütewise. aber vor üüs schiint eine no mit em kassierer es kafi z’näh, es gaht und gaht nöd vorwärts. wo s kafichränzli verbii isch schiint die ganzi sach echli is flutschte zcho, doch genau die 3 ehemalige bewohner vonere insle im südoschte vo indie gsänd echli suschpäckt uus. z’erscht bruucht er es päckli zigi, nei denn nämemer doch grad 2, dänn hetti no gärn e chliini fläsche johnny walker wo de fründlichi kassierer natürli z’ersch no am nordpol mues go bsorge. wo dänn äntlich alli glüscht gstilled sind, fraget de kassierer doch no fründlich: händ si no feuf rappe? aaaaargh! klar het er die nöd, nei ich han kei coop charte, nei ich wott quittig nöd. ich will nur uf de verdammti zug. obwohl mer es eigetli no rechtziitig gschaffed hättet het die hürbi etz no 4 minute verspätig und mir verpassed so wahrschinli de bus am tiefebrunne, aber was sölls…mir sind eus ja s warte etz gwöhnt, esischeso!

ps: de bus hämmer dänn aber gliich verwütscht… 😀

he hütt isch voll krass gsi weisch, hani briefchaschte ufgmacht und was isch ims der briefchaschte gsi, es brief, krass! hani ims ufgmacht, luegt mich der albanische fahne mit doppelte adlerchopf a, hani dänckt, ah ferie ims albanie, nei chasch ims däncke. kredit vom de bank credit-now, isch ims brief alles albanisch gschribe. aber waisch, bank isch voll tumm, ich bin gar nöd albaner ich bin ussländer! esischeso…

i het nie dänkt das i das je mal wird inen blog ine schriibe. hüt hani mis neue mac teil becho, die ziele won i etz da schriibe sind die erschte par zeiche woni i das teil igib. das ding isch recht edel verarbeitet und no jungfräulich rein. eigetli hanis kauft, damit i mal cubase druff tue chan um echli sälber am sound ume z’tüftle. aber wahrschindli wirds nöd nur bi dem bliibe, min pc isch langsam alt und ächzt im züüg ummenand, wahrschinli macht ers nümm lang, denn hani wenigstens es teil wo ni no druf chan schaffe und ersch recht no guet uusgseht, esischeso!

d’idee isch wie vieles bimene bierli inere luschtige rundi entstande, muesch di mal achte, wieviel mal me, (mit me meini dich, mich und susch alli wo me demit meine cha), also ebä wieviel mal me „esischeso“ als kommentar abgit. esischeso! das passiert no gli mal und us dem grund gits a dere adresse im netz de blog. das wordpress isch scho super, aber so ab de stange isch es scho chli mainstream, aber es gseht guet us! im moment hani grad nüd gschiders z’sägä als das wo scho da staht, also lahnis für etz mal la blibe, esischeso!

Willkommen zur deutschen Version von WordPress. Dies ist der erste Artikel. Sie können ihn bearbeiten oder löschen. Gehen Sie, um Spam zu vermeiden, doch gleich mal in den Pluginbereich und aktivieren Sie die entsprechenden Plugins. So, und nun genug lamentiert – jetzt nichts wie ran ans Bloggen!