esischeso.ch

per zuefall hani hüt d’siite mixcloud.com entdeckt. als dj muess me de suisa gebühre entrichte. wenn ich en song imene mix verwände und online stelle mues ich z’ok vom artist ha oder ebä gebühre entrichte. uf mixcloud chani mini dj-sets ufelade, d’artiste erhaltet vo mixcloud ihres gäld. daher isch es notwändig, das i e tracklist vo de gspiilte tracks agibe, darum wird e setlist verlangt. das ganzi isch au mit de verschidene social networks verchnüpft, so erspart me sich doppelerfassige, mir läbed indere vernetzte wält, esischeso!

am letschte friitig am 28.05.2010 hani chöne a de 1 jahr jubiläumsparty vom label play it loud im gaskessel z’bärn uflegge. ich hami mit emene liquid set beworbe und offebar gwunne. vom viertel vor eis bis am viertel vor zwei hani chöne sound mache. leider hets gar wänig lüüt gha, de newcomer floor isch leer gsi. im mainfloor het noisia sound gmacht, wer die kennt weiss was das heisst. die malträtieret d’alag und z’publikum mit drum and bass vom feinschte, ich wär wohl au im mainfloor gsi, als dene newcomers zue z’lose. immerhin hani guets feedback zum sound becho und so bliibt mer das als coole abig in erinnerig, esischeso!

schön wärs… vorerscht backi no chlineri brötli. aber uf discogs dot com bini under de „beschte“ 10’000! Pro biitrag gits pünkt, also für jedi platte woni de sammlig hinzu füege gits pünkt, für jedi änderig gits pünkt und so bini a dem wuchenänd under di erschte 10’000 cho, esischeso!

mittlerwiile hani rund 1’500 titel, das sind rund 2’000 12″ platte oder rund 4’000 dnb tracks i minere sammlig. die hani allesamt uf discogs erfasst. das isch scho no e hammer plattform, für mich vorallem interessant wili det chan date für mini vinyldb absuuge, denn sitt ca. 2 jahr staht en api zur verfüegig. leider chame d’stuck nöd alose, bi einzelne sind aber youtube videos dezue verlinkt, so dass me uf dem wäg doch no d’möglichkeit het, d’tracks azlose. wer mini sammlig möcht virtuell aluege folgt dem link, und wer mini sets wot alose folgt dem link und registriert sich, esischeso!

ich han die blödi eigeschafft, das i tuusig projekt gliichziitig han, vo welnä ich 990 gar nöd afange wil ich si wieder vergässe han und die reschtlich zeh teiled sich die spärlichi ziit. deed.ch isch so nes projekt, da hani i letschter ziit e chli vorwärts gmacht. vor drüü jahr het mich de drum n‘ bass infiziert und falls ich mal neumed uflegge, dann underem name deed. gschiidi lüt merked das de name tatsächlich öppis mit miim name z’tue het. anyway, uf deed.ch, woni übrigens mit typolight erstellt han, sind vorerscht mal nur mini neu erstellte drum n‘ bass mixes z’finde. wiitere content folgt aber meh wotti a dere stell nonig verrate. gheimnis mached gwunderig, esischeso!

letschti bini vom mittagässe zrugg is gschäft cho, und bevori i de lade zrugggange bin, bini zersch in musiglade unde ine gange. ich han doch vor es paar mönet brichtet, ich heg mer es schiggs mac book pro gchauft. de eigentlichi grund isch gsi, mit dem schmugge teil echli musig z mache, schliessli chunnt da ja mit garageband scho es programm mit, wo för de afang scho mal langet, doch mit de mac tastatur musig z mache isch mer denn doch echli z blöd gsi, also hani mer gseit: du bruchsch es midi keyboard, gesagt getan (achtung, das isch etz uusnahmswiis echli hochtütsch gsi, uf schwiizertüütsch chunnt ke sau drus wie me das seit), also ebä wie gseit und voilà (achtung franz!) hani mir das teil poschtet. uuspackt, iigschteggt und umz-umz-umz, mit dem teil machsch no recht kuuhle sound. het zwar dutzendi vo iistellige woni überhaupt nöd kapiere aber wie seit me doch so schön, lörning bei duing oder so. etz tueni mi mal drahtaschte wie me drum n‘ bass macht. wämme de sound eifach konsumiert isch me schnell mal drbi und seit, das chani au. bis denn mal vor dem musigprogramm stahsch und merggsch, höööh und etz? was sölli mache? ebä genau um d’antwort uf die frag gahts etz die nächschte paar wuche, soisches, oder besser gseit, esischeso!

han vome kolleg e rechti sammlig a detroit scherbene usglehnt becho. voller freud hani mi as werch gmacht, han aber schnäll festgstellt, dass es e rechti umstellig isch. bim drum and bass hesch viel klareri liedstrukture, de ufbau vom lied und die einzelne „kapitel“ sind klarer. detroit het sehr langi liedstrukture wo sich minim änderet, da chame sehr guet zwei oder mehreri plattene langi ziit synchron laufe la. bim dnb hets viel meh breakdowns und dramaturgischi uf- und abbauelement zudem sind praktisch alli dnb maxi singles mit 45rpm presst und händ pro siite eis lied. so sind uf de platte sälber klari liedstrukture ersichtlich, wil de groove nöd so eng prässt isch. bim detroit sind sehr viel plattene mit drü bis vier lieder presst, dur das sind d’liedstrukture uf de platte nöd so guet sichtbar. uf alli fäll macht mer s’mische mit dnb dütlich meh spass, esischeso!

…zvil chraft. etz hani doch nur wellä echli sound mache und die #%*¢@-platte isch echli boge gsi, dänn hani dänkt „büügsch si echli grad“ und päff, das ding bricht. das gits gar nöd! eifach zvil chraft, esischeso!

am sunntig hani s’internetradio bassdrive entdeckt und bin sit det zimli gflashed! durchwegs hammer sound usem gsamte dnb-universum. das ganze chunnt usem big äppel inere hammer qualität. män ich lose scho es wili de sound aber ich han im netz no nie en sender gfunde wo so konstant de nagel uf em chopf trifft. das liit sicher au da dra, das in england sehr viel jump up gsendet wird, bassdrive isch da scho eher uf the tech wälle, da packi grad mis board us und fang a waveride (träum wiiter), esischeso!