esischeso.ch

saletti zämä, es isch eso, in aarau gits la caverna, won i nöd xeh han, aber das holi bi glägeheit no nache, versproche. caverna, also höhli, so heisst e pizzeria in aarau, si heisst eso, wil im chäller imene ageblich schöne gwölb pizza ab em meter chan verspise wärde. richtig, gässe wird d’pizza und gmässe in meter, mindestens a halbe meter mues me ässe chännä, süsch mues me dobe im take away vorlieb neh. deshalb han i la caverna nonig sälber xeh, aber pizza hani probiert und die chunnt verdammt nöch a die vo napoli herä. das wome hierzulande i vielne guete pizzerias uuftisched bechont, chan zwar durchuus sehr guet si, aber wer scho mal e echti neapolitanischi pizza gässe het, weiss was i meine. e pizza napoli het hierzulande meischtens sardelle, kapere und mängmal olive druf. aber in neapel wirsch müeh ha, e sone pizza z’finde wo pizza napoli heisst. die wenigschte pizzerias i de schwiiz händ salsiccia im agebot, obwohl pizza con salsiccia e friarielli (stengelkohl) eini vo de klassiker isch. also, wennis s’nöchschte mal schaffe is gwölb abezstiige und pizza immerno so guet isch wie im take away, dann heissts mal wieder, esischeso!

ich han scho s einte oder andere über s restaurant birchegg ghört, aber me mues es erläbt ha, süsch glaubsch es nöd. also reserviert hämmer uf di sächsi, am 10 ab im birchegg acho isch ke sau ume xi. also simmer dusse bi de garte terrasse heräghocket und händ gwartet. so nach 10 minute chunnt de chef. luegt üüs grimmig ah und lauft mürrisch a eus verbii. churz spöter chunnt er mit 2 aperogetränk wo mir nöd bschtellt händ a euse tisch und fraget unfründlich: „warted ihr uf öppis?“, stellt d gläser herä und lauft wieder weg. mir trinked de apero und gönd langsam ine. dänn warted mir druf, das er eus euse tisch zeiget. „hine links, herähocke!“ zischt er.  mir nämed platz, ich grad im eggä a de wand. aber das passt em cheff nöd! „platz wächsle“, ich probier echli mit ihm z’pläuderla, sini antwort „das isch diis problem, platz wächsle, d frau sitzt det!“. „ässed ihr alles?“, d antwort isch „ja“, dänn chunnt en täller antipasti mit villne italienische spezialitäte, absolut lecker isch das xi. übrigens au der hämmer nöd bschtellt. genau so wi de wii und s’wasser. als nächschts git es tris vo steipilzrisotto, lasagne und ricottatortelloni, alles vorzüglich zuebereitet. echli gwöhnigsbedürftig für eusi verhältnis isch de salat xi, au der sehr fein, aber irgendwie hämmer das a dere stell nöd erwartet, wil mir de salat au nöd bschtellt händ. langsam recht satt, chunnt de cheff und fraget: „händer luscht uf fleisch, fisch oder chalbsläberli?“, mini begleitig fraget, „was isch für fleisch“ und das isch en fähler xi. zimmli gnärvt butzt er si abe, git kei richtigi antwort und zieht devo. eigetli het si wellä säge, dass sie nümm soviel mag. si ninnt fleisch ich fisch. churz druf abe chunnt de täller, wie bschtellt und er isch sogar echli fründlich und seit „c’est pas boucoup“, au de gang isch vorzüglich xi. bevor de kaffi, wo mir au nöd bschtellt händ, serviert wird, gits no es hervorragends früchtedessert. nachdem mir ja doch es paar mal vom cheff abe putzt worde sind, hämmer üs fasch nöd getraut nach de rächnig z frage. aber binere günschtige glägeheit, hanis doch gschafft in a euse tisch z locke. uf min hiiwiis, das mir langsam hei möchtet zischt er wiedermal „das isch diis problem“, aber er chunnt drufabe mit dr rächnig. das mannli chunnt aus us de gliiche gägend wie ich us italie, bim usegah hämmer no es paar wort gwächslet und det het er sich doch ganz fründlich zeiget, de michele. di ganzi art wie er siis restaurant füehrt isch konzept. es git was er bringt, du zahlsch was er seit, frage sind nöd erlaubt. de priis isch meh als fair und alli gäng sind hervorragend xi. dr dame het er no e rose id hand druckt. leider wird de michele nächscht märz uufhöre, aber mir wärdet sicher no eimal ineluege, esischeso!

in oerlike a de schaffhuserstrass drüü füf drüü, det isch de tschingg. kes restaurant im eigetliche sinn, eher en take away. es git pasta im take away und im lade verschiedeni italienischi  spezialitäte. pasta gits i drüü verschiedene portione, di mittleri (normal) gits für nüün stutz und für mich langed das beschtens. letscht mal hets pasta mitere rüeblicreme und bluemechol geh, für mini begriff zimli exotisch aber es het gschmöckt. standardmässig gits pasta mit sugo oder pesto und immer zwei variatione mit saisonalem gmües. und di gueti nachricht isch, dass es bald im oberdorf au en tschingg git, irgendwie hani sgfühl, dass ich det öfters sii wird, esischeso!

scho es paar mal isch mer z’restaurant „il golosone“ a de uraniastrass 20 in züri empfohle worde. unfründlich sigets det aber s’ässe sig aber mega. uf euser tramodysse simmer zum z’mittag da herä cho. d’lag im zürcher chreis 1, de blick durs fänschter wo e huufe grawatteträger uuszmache gsi sind es eher chüels interiör händ bi mir churz s’gfühl uufcho loh, dass es vilicht stimmt was me über das restaurant so ghört. über mittag sind viel bänkler awesend au nach 13 Uhr, es isch also au entsprächend luut. mir wärdet zwar echli spöter als euse nachbartisch bedient, obwohl mir es paar minute vorher acho sind. aber da es sich bi euse nachbare um zwei hübschi italienerinne ghandlet het und s’servierpersonal nuch im brunftalter befindet hämmer da es aug zuegmacht, es paar minute spöter sind mir au bedient worde. 20 franke chostet es pizzamenu mit salat. mini charmanti begleitit het e pizza mit ere zwiblespezialität us appulie gno, ich han de versuechig widerstande und anstatt e pizza napoli e pizza mit 4 verschiedene salami gno. de salat isch sosolala gsi, lieblos und mit ere standard sauce, guet, ma cha da au nöd viel falsch mache und d’hauptdisziplin isch nun mal d’pizza. wo si aglifered wird chunnt scho mal s’augewasser, das teil isch riesig! de erschti schnitt verspricht e chnusprigs erläbnis und de erschti biss isch orgasmatisch! biss für biss en wahre gnuss. d’zwieblepizza isch rächt süess und durchuus empfählenswert, mit echli peperoncino isch es fascht e sweet and sauer pizza. es isch sicher übertribe z’sägä mir wäred wie könige behandelt worde, aber d’ufmerksamkeit isch für mini begriff guet gsi, mir händ relativ zügig chöne bstelle, sässe isch rächtziitig cho und s’trinke, de ramazzotti und d’rächnig sind prompt a tisch bracht worde. also, als fazit chame sicher säge, de typischi italiener gseht andersch uus, s’personal erfüllt die normale aasprüch und sässe übertrifft si, vorallem bi de pizza um längene, also probiere gaht über studiere, esischeso!

es isch wieder mal ziit für es echts highlight a derä stell. im blockhuus am hechtplatz wird konstant top qualität gliferet, e richtigi gnusshöhli a beschter lag. tartar isch de klassiker, das gits in mehrere variatone, mini leibspeise isch s’tartar mit aglio, olio, cipolla e peperoncini, e echti wucht! im blockhuus fühlt me sich pudeliwohl, d’bedienig isch ufmerksam, temperamentvoll und nie um en lockere spruch verläge. bezüglich wii und spirituose findet me da uusgwogeni und riichhaltigi uswahl. zum glück isch das restaurant eis vo de lieblingsort vo minere charmante begleitig, so findet sich immer e uusred um gschwind is blockhuus go cherä, esischeso!

nei, da gahts für eimal nöd um formel1, tankstops sind ab dere saison verbotte, sondern wieder um es restaurant. fahrt me im moment in züri tram, so cha de uufmerksami fahrgast de guetschii fürs restaurant tank finde. uf em 2-er tram hets zum bischpiil sones uushängeteil, mit dene guetschii drin. wil ich miis fiirabigbier i de pornobar am stüssihof trunke han, bini grad am grill restaurant verbii gloffe. schmöcke tuets scho sehr nach grill, wäme inechunnt. als vorspiis hets de appetizer journey für 2 persone geh. vo allem echli öppis. d’spare-rips sind köschtlich gsi, au die peperoni-nuss paste, und d’pfluume im späckmantel e echti überraschig! bim hauptgang bini aber fascht devo gloffe. mis cavallo of parma isch no gange, s’fleisch isch echli zäch gsi und bilage, peperoni, zuchetti und melanzane sind unspektakulär gsi. d’spareribs vo mim gägenüber hani nöd probiert, deför d’pommefrits und die sind so fettig gsi, das me demit en motorblock hetti chöne schmiere. guet hämmer en guetschii gha, so hämmer ein hauptgang chöne spare, so schnäll werdi nümm da herägah….esischeso!

zerscht mal imene wagamama bini in london gsii, und scho det bini begeischteret gsi. abgseh devo das ich de asiatische chuchi sehr zuegneigt bin het mir aber vor allem das jung-lockere-urbane-unkomplizierte flair bsunders gfalle. woni denn ghört han, dass es bald in züri es wagamama git, hani vor freud afange stottere. es het mal plän geh, es wagamama im seefeld z’eröffne, leider het das wäg de riesige baustell letscht jahr im seefeld nöd klappet, so en seich nomal. aber egal, a de sihlporte gits sit bald 2 jahr es wagamama. wenn ihr e kokossuppe bschtellet müender nöd ab en gliferete löffel verschrecke, ihr chömed, wenn ihr nett fraget au en „normale“ löffel über. was me bschtellt chunnt i de regel sofort, me wird au druf hiigwise, dass z’ässe chunnt wenns fertig isch. das heisst bschtellt öpper nur en hauptgang und der ander zuesätzlich e vorspiis, so wird höchtwahrschiinli de einti de hauptgang übercho wenn der anderi sini vorspiis überchunnt. serviere tüend i de regel jungi, urbani lüüt. es wird sehr wert uf es lockers uufträtte gleit. die asiatische gricht sind alli frisch zuebereitet, me cha de chöch bi ihrem handwärch au zueluege. als vorspiis hets 5 chicken gyoza und ebi katsu gäh. gyoza sind teigtäsche und ebi katsu sind riesegrövettä im chnusprige teigmantel. die katsu sind de absoluti hammer gsi! die chilisauce wo debi serviert wird isch eifach uhuere guet, scheiss uf gastrokritikfirlifanz, eifach uhuere guet, punkt! als hauptgang han ich s’88gi und mini begleitig s’71gi gno, das was me bschtellt het wird grad in grosse zahle ufs tischset gschriibe und s’personal kännt jedes gricht per zahl und per name. 71 = chicken katsu curry, 88 = gunger beef cohan. i liebe di asiatischi chuchi wil vieles durenand uf em täller isch, und so isches au bim 88gi. me merkt würggli, dass alles frisch zuebereitet isch. ich bin immer fuschtriert wenn ich zum wagamama usegäng, eifach will ich satt bin aber am liebschte wür wiiterässe, so fein isch das züüg, esischeso!

es isch zwar letscht wuche gsii, woni i dr bodega gsii bin aber es isch durchuus schriibenswert, was det botte wird. agfange bim ambiente, dunkles holz dominiert s’innere vom restaurant im erschte stock. im parterre chame, soviel i weiss, zu feine tapas en guete tropfe gnüsse, wer aber en grössere hunger hät, was bi mir im momänt öfters de fall isch, der mues scho in erschte stock gah. s’personal isch echt spanisch, aber me chunnt mit schwiizertütsch au guet zum ziel. d’gringos sind alli gliich agleit, weiss zwar nöd wie me dem rote schal um de ranze seit, aber ebä, so eine händs um d’hüfte gschwunge. als vorspiis hets für mi e portion jamon serrano geh, hani, oh schande, no nie imene restaurant gha. als italiener isch natürli en vergliich zum prosciutto di parma agseit, ganz objektiv isch mini meinig nöd, aber ich persönlich find de parma besser. de serrano het e anderi konsistenz und isch weniger saftig wie de schwager us italie. als hauptgang het es rindfilet (medium) mit de wiit ume globte pommes frites geh. s’fleisch isch butterzart gsi, usse recht chnusperig inne leider no echli z’fescht roh, han doch medium gseit aber das isch wohl uf em wäg id chuchi verlore gange. ich bin nöd en uusgsprochene paella fan, aber das wo mini zwei wiibliche beigleiterinne bstellt händ het au no für mich glanget. und das isch e wucht gsi! paella gits nur ab 2 persone, aber das züüg isch so fein gsi, ich hets au alleige gässe, esischeso!

es isch wieder mal zit für es (für mich) neus restaurant. hüt simmer, uf en vorschlag vomene arbetskolleg im bluetige duume im zürcher niederdorf sii. d’erwartige sind nöd bescheide gsi, aber s’ässe scho. nei, es git ken grund de lade schlecht z’mache, prislich und vo de qualität her stimmts allimal, e eifachi beiz mit emene überschaubare bieragebot und währschafter huusmannschoscht. für en glägeheitsraucher wie ich eine bin isch positiv z’erwähne, dass es ersch erlaubt isch z’rauche wenn di meischte lüüt scho gässe händ, big ups! doch die vorschusslorbeere vo mim arbetskolleg händ d’erwartige scho es bitz stiige lah, und die sind nöd ganz erfüllt worde. de nüsslisalat mit ei isch passabel gsi, s’empfolene zürigschnätzletzs mit rösti isch definitiv nüüt speziells gsi. faad und langwilig, sorry aber ——-> esischeso!

im napoli erwartet dich es eimaligs interiör, uf de spiischarte gits köstlichkeite a l’italiana. de gerardo isch durchus en engagierte gastgeber aber was de service da so leischtet entspricht nöd dem was me vomene top restaurant erwartet. bstellt hani en minestrone di verdure fresche un becho hani e tomatesuppe, di isch au sehr fein gsi, aber die hani eifach nöd bschtellt gha. de wolfsbarsch hets nur ab 2 persone geh, obwohl vo dem nüt i de charte gstande isch, d’vongole sind genau so wenig verfüegbar gsi, wie de wii wo mer für üses ässe usgläse händ. ufs ässe hämmer e gschlageni stund chänne warte und wos denn cho isch, mues me säge „ok“, nöd schlächt, aber au nöd überwältigend. uf d’rächnig wartisch denn au mal gärn nomal e halb stund und meh, usser du machsch dich bim scheff bemerkbar. s’gägeteil vo guet gmacht isch nun mal „guet gmeint“, obwohl me zur begrüessig feini bruschette und en champagner offeriert überchunnt und zur versöhnig nach ere desolate serviceleischtig en spezielle schnapps serviert, da gerardo herrschet zueständ wie in neapel, esischeso!