esischeso.ch

Kalif werde anstelle vom Kalif, das isch am Isnogud siis permanänte ziil. Vom Goscinny kännt me sicherlich de Asterix und de Obelix. Isnogud isch es projäkt won er zäme mit em Tabary realisiert het. Am aafang hani tänkt: „Wieso mues ich eigetli jedi empfälig chaufe, das wird i doch niä läse…“. Aber wil ich ja immer läse was ich chaufe, au wänn ich evtl. nöd ganz überzoge bin, hani mi also a diä lektüre gmacht. De Isnogud isch e hinderlischtigi ratte! Nüd würklich aber im überträgene sinn. Er isch de grosswesir vo Bagdad und het nur eis ziil: „Kalif werde anstelle vom Kalif“, und das zu jedem Priis! Das Band woni gläse han isch es Buech vo ca. 150 Siite, z’guete bim Isnogud findi, das jedes Abentüür für sich rächt churz isch, max. 8 – 10 siite lang. So chame mal 10 Minute here hocke und es churzes päusli iilegge. Natürli schaffts de Isnogud nie siin bösartige Plan gäg de guetmüetigi, pummeligi und restlos naivi Kalif Harun al Pussah durezbringe. Er flüügt ständig uf siini spitzigi nase und kheit ununterbroche in grabe woner am Kalif grabed het. Ich bin positiv überrascht und werde mir sicherlich noch s’einte oder anderi abentüür vom Isnogud inezieh, er isch nämmli besser als de name es vermuete laht, esischeso!

vieli monet sind vergange sitt ich mis letschte comic gläse han, umso meh bini denn au iitaucht ine fesselndi und nöd minder tragischi gschicht. unsichtbare hände isch en titel wo z’dänke git. es handled sich debi umene gschicht über d’migration us nordafrika nach europa. es aktuells thema also, won ich de meinig bin, dass ma da devor d’auge nöd sött und dörf verschlüsse. d’gschicht verzellt vo de gsellschaftliche korsett im muslimische norde vom schwarze kontinent, über d’macheschafte vo de skrupellose schlepper, über die skandalösi uusbüütig i de spanische plantage, vo de eifache verspräche vo de islamistische eiferer und nöd z’letscht vomene tragische schicksal, wo sich täglich nöd wiit vo üüs chan ereigne. am schluss vo dere gschicht baut sich en unglaublichi spannig uuf, und ich han nach jedere siite ghofft, das es no guet chunnt. de schluss möchti a dere stell nöd verrate, nör soviel: de titel vom comic wird uf der allerletschte siite klar, aber öbs guet chunnt oder nöd, da defür müender s’comic scho sälber id händ neh, esischeso.

als zwilling hani doch s’einte oder andera hobby und liide vo ziit zu ziit a de paradoxe situation, das es mir langwilig isch wili mi eifach nöd chan entscheide was i etz mit minere freie ziit söll afange. ganz luschtig wirds aber dänn, wänni zwei hobbies mitenand chan kombiniere und so miis ziitdefizit wieder uufhole. di zwei hobbies woni hüt kombiniert han sind „comics“ und „organisierts verbräche“. nei, ich han ken comiclade überfalle und au nöd schutzgäld erprässt, sondern eifach z comic „cosa nostra“ afangä läse. scho z’format vom comic het mich überzüügt. als graphic novel chunnts in buechform derhär und liit wunderbar i dr hand. anders als die monatlich erschiinende superheldä, muesch da scho echli länger heräsitze und dich durewälzä. d’story isch fundiert recherchiert worde und bliibt nöch bi de tatsache. es isch also nüüt figgtivs, de lucky luciano, de al capone und wiiteri ziitgenosse werdet uf überliferte tatsache basierend beschribe. speziell isch de ahang mit historische föteli und erlüterige zerwähne. also hani hütt es comic gläse über es thema woni mi scho sit längerem demit befasse und dezue hani sogar drum and bass glosed. etz söll no öpper säge mir manne siged nöd multitaskingfähig, drüü flüge uf ei chlapf heisst das! esischeso!

unschärfewas? und was fürne bärg? in phüsik hani en fänschterplatz gha, de zug isch mehrmals abgfahre. und au wenn de lehrer, de legendäri eschcribao, versproche het: „etz händ alli nomal d’möglichkeit uf de zug uufzstiige“, isch er garantiert am ändi vo de stund ohni mich devo dampft. ich han etz nöd plötzli freud a de phüsik becho, nei, ich han de zweiti teil vom schimpansekomplex gläse. d’reis uf de mars bringt einigi überaschige as tagesliecht, und ich bin letscht mal gar nöd so schlächt gläge, woni gschribe han ich werdi no gaga, weni de zweiti teil nöd bald lise. de gagarin taucht i de gschicht rächt prominänt uf, genau er isches, wo öppis vo unscharfe bärge verzellt. vilicht müsst er mal zum optiker, wenn er die bärge nümm scharf xeht. aber heh, vilicht hät im das no niemer xeit? woni am ändi vom comic acho bin, xehts glich us wie letscht mal, ich mues mer so schnäll wie möglich de dritti teil beschaffe, mit oder ohni gagabrille, esischeso!

was de todd mcfarlane id händ nint, wird zu gold. haunt, so heisst siis neue meischterwärch woner under anderem mitem greg capullo zeichnet het. obwohl d’gschicht e schlechti kopie vo siim beschte ross im stall „spawn“ chönnti si, überzügt mich de titel vo afang a. es gaht wieder um agente, unerfüllti liebi und läbensschicksal und das alles inere morbide wält, ganz nach em klassische mcfarlane bild. wie gseit, d’ähnlichkeite zu spawn sind frappant.

vili comichelde und antihelde händ nach ere gwüsse ziit e midlifecrisis, nei im ernscht das ich ke witz. jedi figur us dem genre macht irgendwänn mal sini sinnkriise dure. da wird druflosgstorbe und in paralleluniversä überläbt oder es tauched plötzlich en klon vo eim uf wo die bisherigi gschicht (wo zum teil über 50 jahr alt isch) völlig uf de chopf stellt. söttig „grossereignis“ diened de industrie um ihri nömm ganz frische charaktere wieder mit läbe z’fülle und die miserable verchaufszahle wieder echli azkurble. sitt em boom vo comichelde i de filmindustrie isch es aber nömm so dramatisch wie mitti vo de nüünzger jahr. doch das isch bi spawn und haunt es bitzli andersch vor sich gange. mini these isch die, dass haunt s’produkt us de erfahrige vo sinere vorlag „spawn“ isch. spawn isch immerno en toptitel und eine vo de gröschte comic erfolg vo de letschte jahr. de farlane und sini kollege sind wohl eifach zämäghogged und händ sich de chopf zerbroche was me a spawn besser mache chan. und die ideä sind dänn in haunt inegflosse, obs ächt würggli eso xii  isch, das weissi nöd, isch aber au egal, esischeso…

es isch wiedermal ziit für en neue post, ich hans i letschter ziit echli schliife lah, und han es riiiisigs schlächts gwüsse, ja scho fascht en komplex. demit hettemer au elegant zum titel vom letschte comic woni gläse han übergleitet. „der schimpansenkomplex“ so heisst es seins figgschn 😉 comic erschine bim splitter verlag. im jahr 2035 landet e ruumchapsle im indische ozean, a bord sind de neil armstrong und de buzz aldrin. es isch klar dass alli dänked „die sind doch gaga“ und si werdet wegsgschperrt, im wiitere verlauf passiered sache wo mit „normalem“ verstand schwierig z’erkläre sind. zviel möchti aber nöd verzellä. uf alli fäll wird scho im erschte band e spannig uufbaut wo luscht uf meh macht, ich mues mer also möglischt bald die reschtliche 2 bänder besorge süsch werdeni würggli au no gaga, esischeso…

s’druidetum isch in ängland als religion anerkännt worde, das hani hüt i dr nzz am sunntig gläse, so wiit so guet. de einzig druid woni kenn isch de miraculix, aber der isch ja bi de gallier. anyway, churz über de kanal gschwumme isch me ja glii mal in ängland. also ab jetzt werdet druide behandlet wie alli andere religione. en fortschritt fürd mänschheit? ke ahnig, aber per zuefall lisi grad s’comic ‚die druiden‚, erschine im splitter verlag. das comic isch zämä mit spezialischte entstande um die damaligi ziit möglichscht autenthisch chöne wiederzgeh. d’gschicht spilt am ändi vom 5 jahrhundert. d’chrischte uf dr insle fönd ah sich gedanke z’mache öb doch alles gottbestimmt isch, oder öb de mänsch sälber au chan iifluss neh. s’druidetum staht i derä ziit mit em rugge zur wand, d’druide werdet vo de chrischtliche religion verdrängt. ich möcht eu das comic as härz leggä. es isch en thriller wo inere ziit lang vor üserer ziit spilt. d’spannig zwüsched de innerchristliche strömige und de tuusig jahr alte druidebrüüch wird guet vermittlet. de zeichnigsstil isch zimlich realistisch und i mine auge vo höcher qualität. da d’druide es zentrals elemänt i derä gschicht sind, findet au episode statt, wo d’brüüch und glaubensgrundsätz vo de druide repräsentieret, also entfüehrige nach avalon inklusive. ob dur das, das z druidetum etz in ängland als religion anerkännt isch, sich d’situation vo de druide würklich verbesseret sei dahingestellt. aber dass das comic läsenswert isch und es guets bild vo de druide vermittlet, da dezue chani nur säge: esischeso!

gmeint sind superheldecomics, es ist vollbracht! ich bin wieder topaktuell! was monatlich usechunt bini wider völlig a schur 😉 us dem grund hani zur abwächslich mal i mini „chaufi und lisi dänn emäl“ chischte glanged und debi isch folgendes usecho…berlin am ändi vo de 20ger jahr, das isch z’thema vo „berlin“ vom jason lutes (link zur läseprob) (nur für „nicht facebook leser“, det funktioniert de link nämli nöd, warum? bö, weiss nöd, esischwohleifacheso… also berlin isch läsenswert, e verfüehrig is berlin zwüsched de beide wältchrieg, technologie wo ufchunnt, uufbruchstimmig und wertekampf dur alli schichte, das isch berlin, ziends eu mal ine.

dänn hani no (link->“heute ist der letzte tag vom rest deines lebens“ <-link) vo de ulli lust (kei witz, die heisst eso) verschlunge. e 450 siitige schunke, scho di beide berlin bänd sind zämä 450 siite xi, krass gäll…! de zeichnigsstil isch chli gwöhnigsbedürftig, me isch isch scho fascht gneigt z säge „speziell“. aber d gschicht derhinder isch echt, also nix pipifax sondern true life. e trip vo 2 punkgirls i de 80er jahr vo wien uf palermo, und ich säge eu, die italos du, das sind denn souhüng, esischeso 😉

ja, lang ischs her sit ich s’letscht mal bloggt han, sinnkrise oder so ähnlich, vilicht au nur zviel im chopf, tuusig ideä, mal det en funke mal da en gedankeblitz und so bliibt me immer a öppisem dra und macht vo allem e bitz, wow das reimt sich sogar! wenn ich mini wp-kategorie so aluege, dann hani vo all dem i dr zwüscheziit alles gmacht, guet, s’blogge isch scho chli z’churz cho, ich werd mi bessere. ich füere hüt d’kategorie ‚comics‘ i, eifach usem grund, will i da derzue halt au öppis z’säge han. ich bin bi mine comics, nachdem ich bi de x-men und spiderman serie en 2 jahres, und bi wolverine en 5(!) jahres rückstand ufgholt han endlich bim mitternachtsdetektiv batman acho. de al (achtung! insiderwüsse gfraget), wird sich i de höll en tee choche wenn er das etz list, aber batman isch huere geil! ich frag mich zwar hin und wieder öbs äch stimmt, dass die zwei schwul sind, denn die gönd ab wienes zäpfli, esischeso!