dass s’appenzeller bier eis vo de beschte isch, isch wiit ume bekannt. etz hani mal es holzfassbier probiert und mues säge, das züg isch huere guet! eimal meh bestätigts, dass es sich lohnt neui sache uszprobiere. das bier isch rund und voll im gschmack, dur d’lagerig im holzfass chunts e ganz e spezielli würzigi note über. und wieder es appenzeller bier wo wiit obe uf minere beschteliste isch, esischeso!
Archive for Oktober, 2009
au es bier chan im holzfass glageret werde
Samstag, Oktober 17th, 2009josef a de gasometerstrass
Dienstag, Oktober 13th, 2009im chreis cheib hets di eint oder anderi kulinarischi perle versteckt. im josef gits ke hauptgang und du chasch, wennd wotsch, dini mahlziit mit emene stuck chueche und kafi afo. me bschtellt 2,3 oder 4 teller und stellt sich die nach wunsch zäme, d’portione sind agmässe, d’empfelig „drü täller für de normali hunger“ isch nöd schlecht. s’volk isch trendy-vo-allem-e-chli, spezielli bilder und collage a de wänd schaffed e trendy atmosphäre und s’iigspilte team isch fründlich und effizient. das wo uf de tisch chunnt isch guet zuebereitet und nöd alltäglich. ich han mir eifachheitshalber eifach es menu (5 Teller) gönnt, so hani nöd müesse uswähle. de schwinsbrate uf de tomatepolenta isch köstlich gsi. prislich ischs ok, en abig mit 4 persone inkl. e fläsche wii und kafi rechnisch 350 hämmer, und nachem ässe chame sichs a de bar gmüetlich mache und en ramazzoti, äh en appenzeller chrüter bstellä, esischeso!
gussflusstanz
Freitag, Oktober 9th, 2009ja was heisst etz das scho wieder? ich han halt spass a nöd alltägliche wortkreatzione und ich schere mi en dräck öb me kreatzione würklich eso schriibt 😉 schliessli isch es ja nur min blog, oder? also a derä stell hani 2, genau zwei sache z’brichte. erschtens: „die giesserei“ in örlike mues me gseh ha, es ghobenigs restaurant mit professionellem, überus fründlichem service und emene kulinarische agebot wo wortwörtlich us eim guss chunnt, hochstehendi gricht imene eimalige ambiente, es lohnt sich. aschlüssend simmer id halle go riverdance luege, bis uf die bekloppti dame diräkt hinder üs (mir händ i dr halle immer wahnsinnig glück mit eusne unmittelbare nachbere), wo immer wieder im takt probiert het mit z’klatsche und z’singe mues me säge, die giele händ also scho no zimmli flinggi bei, heieiei! au das lohnt sich allimal, wemme sich wiedermal wet echli als kulturfuzzi usgeh und unbedingt öppis brucht zum de anderä z’verzellä. das tönt etz vilicht echli nöd so guet aber so sölls nöd sii, es isch echt e tolli show es lohnt sich aber, wemme plätz i de vordere reihe buecht, mir sind halt echli wiit hinde gsi, und so händ mini äugli nümm würggli viel gseh. was chunnt etz ächt? klar! esischeso!
ja vas cripts…
Dienstag, Oktober 6th, 2009…ich bin im moment es openbook vo galileo am läse, thema javascript. i programmiere so echli für mich mit php und mysql aber irgendwänn sind d’möglichkeite demit usgschöpft. vorallem wennd echli benutzerfründlichi funktione möchtisch erstelle chunnsch eifach nöd um öppis à la javascript ume. wordpress oder au typolight sind werchzüg wo dur ajax sehr sexy derher chömed und us dem grund hani mi entschide de erschti schritt in agriff z’neh und javascript azluege. was i bisher gseh han isch nüt meh als e wiiteri programmiersprach, vieles isch scho bekannt, jedes programmierbuech liest sich halt doch in etwa gliich. bin aber gspannt druff wenn i mini erschti ajax funktion wird baue, und dänn funklets und glitzereds in mine äugli, esischeso!
mis neue macbook pro isch iitroffe
Montag, Oktober 5th, 2009i het nie dänkt das i das je mal wird inen blog ine schriibe. hüt hani mis neue mac teil becho, die ziele won i etz da schriibe sind die erschte par zeiche woni i das teil igib. das ding isch recht edel verarbeitet und no jungfräulich rein. eigetli hanis kauft, damit i mal cubase druff tue chan um echli sälber am sound ume z’tüftle. aber wahrschindli wirds nöd nur bi dem bliibe, min pc isch langsam alt und ächzt im züüg ummenand, wahrschinli macht ers nümm lang, denn hani wenigstens es teil wo ni no druf chan schaffe und ersch recht no guet uusgseht, esischeso!
detroit vs. dnb
Sonntag, Oktober 4th, 2009han vome kolleg e rechti sammlig a detroit scherbene usglehnt becho. voller freud hani mi as werch gmacht, han aber schnäll festgstellt, dass es e rechti umstellig isch. bim drum and bass hesch viel klareri liedstrukture, de ufbau vom lied und die einzelne „kapitel“ sind klarer. detroit het sehr langi liedstrukture wo sich minim änderet, da chame sehr guet zwei oder mehreri plattene langi ziit synchron laufe la. bim dnb hets viel meh breakdowns und dramaturgischi uf- und abbauelement zudem sind praktisch alli dnb maxi singles mit 45rpm presst und händ pro siite eis lied. so sind uf de platte sälber klari liedstrukture ersichtlich, wil de groove nöd so eng prässt isch. bim detroit sind sehr viel plattene mit drü bis vier lieder presst, dur das sind d’liedstrukture uf de platte nöd so guet sichtbar. uf alli fäll macht mer s’mische mit dnb dütlich meh spass, esischeso!
finnä braued au bier…
Sonntag, Oktober 4th, 2009…und sogar es sehr guets! lapin kulta, das isch für mich immer uf dienstreise in luzern das bier gsi, woni am bahnhof inezoge han zum d’zugfahrt echli z’versüesse. es isch es liechts aber gschmackvolls und erfrischends bier. lapin kulta heisst übersetzt, s’gold vo finnland. ja wenns immer so früeh dunkel isch und überwiegend chalt, denn muess me sich s’läbe süsch irgendwie vergolde, esischeso!
drü roti flagge…
Samstag, Oktober 3rd, 2009…währed em qualifying in suzuka, und das bi trochne bedingige. so öppis hani no nie gseh. de buemi schaffts im q1 en crash z’baue und sich glich bis is q3 dure z’kämpfe und was macht er im q3, er baut en crash, bravo! de glock flügt im q2 eher massiv in reifestapel und wird mit de bahre wegtreit, gueti besserig. und de fisico schaffts nöd über q1, da bini scho enttüscht. suzuka kennt er doch zur genüge und im 3. renne für ferrari dörfti doch zumindest q2 drinligge, etz mach mal vorwärts, gits gar nöd. de kimi schaffts ohni problem is q3, zwar nur achte aber immerhin, esischeso!
zvil chraft, eifach…
Freitag, Oktober 2nd, 2009…zvil chraft. etz hani doch nur wellä echli sound mache und die #%*¢@-platte isch echli boge gsi, dänn hani dänkt „büügsch si echli grad“ und päff, das ding bricht. das gits gar nöd! eifach zvil chraft, esischeso!
de fönsi chunnt…
Donnerstag, Oktober 1st, 2009…zu ferrari, ja das isch die nachricht vo de wuche i de f1. de massa und de fönsi im gliiche team, hoffentli chunnt das guet… die hend sich au scho nach emene renne es „impara a guidare“ = „lern du zersch mal autofare“ an grind gworfe, vor laufende kameras! ich find das guet, isch zwar nöd mini idee gsi, aber fascht eso guet als öbs mini gsi wär de fönsi uf maranello z’hole. schad dass de blassi s’team wird verla, er het us miner sicht nöd schlecht usgseh in rot, esischeso!