…esischeso! inter im final! eigetli hettmä sich das irgendwie nöd chöne vorstellä das barca verlürt. aber wenn die nöd chänd zauberä dänn dänn händ au si ihri problem. aber us taktischer sicht isch das es hammerspiel gsi, esischeso!
Archive for April, 2010
aber etz isches eso…
Mittwoch, April 28th, 2010isch agriff würggli di beschti verteidung?
Mittwoch, April 28th, 2010ich weiss nöd, aber spiel wie das vo hüt zwüsched barca und inter händ en gwüsse reiz. inter baut es bollwerk und barca chunnt und chunnt nöd dure. es isch wie ne krimi, d’spannig stiigt. 2 gol in 15 minute sind machbar und wenn barca en run hät dänn gahts schnäll, päff, päff und aus die maus! di letschti abwehrschlacht isch italie vs. spanie a de em gsii. au das, es spiel wo nüt schöns botte worde isch. damals sind beidi mannschafte no vollzählig gsi, wenn inter hüt durechunnt, dänn händ sis au verdient. barca isch die mannschaft im moment wo im fuässball de ton agit. da mit eim ma weniger es 0:0 hebä isch da nöd ohni! esischeso! aber es isch nonig verbi, es isch also gwüssermasse nonigeso 🙂 gaht no es momäntli…und päff! etz woni han wellä abspeichere, es hammer gol für barca, päff. es gaht schnäll…also…esischnonigeso…
golosone
Sonntag, April 18th, 2010scho es paar mal isch mer z’restaurant „il golosone“ a de uraniastrass 20 in züri empfohle worde. unfründlich sigets det aber s’ässe sig aber mega. uf euser tramodysse simmer zum z’mittag da herä cho. d’lag im zürcher chreis 1, de blick durs fänschter wo e huufe grawatteträger uuszmache gsi sind es eher chüels interiör händ bi mir churz s’gfühl uufcho loh, dass es vilicht stimmt was me über das restaurant so ghört. über mittag sind viel bänkler awesend au nach 13 Uhr, es isch also au entsprächend luut. mir wärdet zwar echli spöter als euse nachbartisch bedient, obwohl mir es paar minute vorher acho sind. aber da es sich bi euse nachbare um zwei hübschi italienerinne ghandlet het und s’servierpersonal nuch im brunftalter befindet hämmer da es aug zuegmacht, es paar minute spöter sind mir au bedient worde. 20 franke chostet es pizzamenu mit salat. mini charmanti begleitit het e pizza mit ere zwiblespezialität us appulie gno, ich han de versuechig widerstande und anstatt e pizza napoli e pizza mit 4 verschiedene salami gno. de salat isch sosolala gsi, lieblos und mit ere standard sauce, guet, ma cha da au nöd viel falsch mache und d’hauptdisziplin isch nun mal d’pizza. wo si aglifered wird chunnt scho mal s’augewasser, das teil isch riesig! de erschti schnitt verspricht e chnusprigs erläbnis und de erschti biss isch orgasmatisch! biss für biss en wahre gnuss. d’zwieblepizza isch rächt süess und durchuus empfählenswert, mit echli peperoncino isch es fascht e sweet and sauer pizza. es isch sicher übertribe z’sägä mir wäred wie könige behandelt worde, aber d’ufmerksamkeit isch für mini begriff guet gsi, mir händ relativ zügig chöne bstelle, sässe isch rächtziitig cho und s’trinke, de ramazzotti und d’rächnig sind prompt a tisch bracht worde. also, als fazit chame sicher säge, de typischi italiener gseht andersch uus, s’personal erfüllt die normale aasprüch und sässe übertrifft si, vorallem bi de pizza um längene, also probiere gaht über studiere, esischeso!
chrüüz und quer mit em tram dur d’zwinglistadt
Donnerstag, April 15th, 2010es isch 6:49 und mir nämed am tiefebrunne de 4-er richtig werdhölzli. es gaht genau 3 statione, und es isch scho die erschti billetkontrolle! mir händ zum glück es zoneabo und fraget de netti herr, wie lang s’zürcher tramschinenetz isch, aber er isch chli verläge wil er weiss es nöd…113.4 kilometer sinds, ohni strecki glattpark-flughafe…
07:05 Bahnhofquai/Hauptbahnhof, s’tram isch guet gfüllt, die meischte sind no echli verschlafe…
07:21 bling! schweiss uf de stirn! information der züri-linie! am sächsilüütte fahrt d’vbz…phiuuu! numal schwein gha! wievielmal werdemer das hüt no ghöre?
mir chämed pünktlich am 07:26 am werdhölzi a und fahret pünktlich am 07:30 mit em 4-er richtig escher-wyss platz. ich han echli es hüngerli! mr sitzd z’hinderscht im cobratram….es isch glaub s’erschti mal, das ich am werdhölzli gsii bin, nüechtern betrachtet isch s’andere ändi vom 4-er scho echli schöner, see vs. klärwerk, en unfaire vergliich…etz gahts z’erscht mal zrugg zum escher-wyss platz…
am 07:47 gahts pünktlich vom escher-wyss platz mit em 13-er richtig franketal wiiter, mir sitzed wieder imene cobra tram, d’lüüt sind etz alli ufem arbetswäg… die cobratram mached scho en cheibe mais, me verstaht chum siis eigete wort…
pünktlich am 08:01 chömemer in franketal a, s’tram fahrt grad wiiter sodass mir 8 minute ziit händ zum öppis zwüsched zänd z’becho. am 08:10 gahts mit em 13-er, wieder imene cobra ab zum albisgüetli. höngg isch e schöni gägend, me het e wunderbare blick über die ganzi stadt.
es isch etz 08:15 und de 13-er isch rächt voll, züri gaht also au erscht nachem 8-i go schaffe.
08:31 mir sind hüt zum zweite mal am Hauptbahnhof, s’tram isch immerno rächt voll…a de bahnhosstrasse wirds richtig äng! nüd mal mit mim netbook hani no aständig platz zum die ziile z’schriibe. es schiint so, dass bänker meh shchlaf bruched als anderi wörker…erscht am uetlihof stiiget alli uus und es hocket no öppe 5 lüüt im tram…wahrschinli schaffed de grossteil bi de cs…
am 08:50 chömed mer am albisgüetli a, di zweiti vollständigi tramlinie isch gschafft, sardinefeeling ab de bahnhofstrass. am 08:55 gahts mit em 13-er wiiter bis zum laubegg, s’tram isch leer.
09:05 laubegg, ich warte bis d’azeig vom tram uf d’zieldestination wächslet und denn fahrt das tram eifach ohni mich ab. mis müüsli isch im tram und ich nöd, schlagrahm! etz heissts: seckle. aber ei station wiiter unde schaffis doch no uf de 5-er, zum glück hets z’ersch no mües chere. d’reis gaht wie geplant wiiter, übrigens z’erschti mal imene tram2000.
09:18 und mir sind wieder am bellevue…es hät etz bedüütend weniger lüüt underwägs…richtig fluntere isch s’tram praktisch leer…
09:27 simmer pünktlich a de chile fluntere acho
09:29 de umstig uf de 6-er het problemlos klappet, da hets echli meh lüüt uf em tram, wahrschinli wägem hb, aber es leert sich schnell uf em weg in zoo, tja e nobli gägend de züriberg…
09:38 s’tram fahrt pünktlich vum zoo richtig bahnhof enge ab…und im tram träffed mir e bsunderi spezies a, es git si alsi würcklich, die züribergdamegsellschaft, tatsächlich!. und etz ab is uni-viertel, de studi groove macht sich langsam bemerkbar. viel ruckseck, wullesöckli und gschiidi lüüt…
09:58, mir sind wieder a de bahnhofstrass, s’tram isch guet gfüllt aber bedütend weniger wie im 13-er. und am rennweg stiigt d’züribergdamegsellschaft us.
10:05 simmer am bahnhof enge acho, en flüügende wächsel uf de 7-er passiert, meischterhaft, am 10:07 gahts ab richitg wollishofe…
10:15 chömed mer z’wollishofe a, ziit für nes kafi, am 10:30 gahts mit em 7-er wiiter richtig bahnhof stettbach, reiseziit 41 minute, han vergässe d’linietafele z’fötele, mischt! vil mitbecho hani nöd vo dere fahrt wil ich mir es spiderman comic inezoge han. etz grad simmer i de u-bahn vo züri zwüsched milchbuck und schamedingerplatz. langsam wirds chli hert uf dene sitz.
11:13 ankunft am bahnohf stettbach, das isch etz scho die 5-ti vollständigi linie gsi, in stettbach e riise baustell, mir bliibet im 7-er sitze uf em wäg zum schwamedingerplatz, abfahrt 11:19. ich wird immer schräg aglueget, wenn i mi sälber vor de tramlinietafele fötele, wieso ächt?
11:25 simmer am schwedingerplatz wo mir uf de 9-er richtig hirzebach umstiiged. mir hand scho profiniveau, de wächsel glingt üs fascht eso schnäll wie ne formel 1 boxestop…
am 11:31 chömed mer in hirzebach a, da gits vor allem fuessballplätz. etz gahts nomal in 47 quer dur di ganzi stadt is heuried, zwüsched de stossziite fahrt de 9-er nöd is triemli. chum abgfahre, wer und wer stiigt im altried i, es zürcher original: de hanf-ueli, er murmled irgend öppis wie: „nei er het nüüt meh gha aber öppis anders“ i siis bärtli aber wiit un breit isch ke sau…
das isch bis etz die längschti tramfahrt und mir fahred zum dritte mal am bellevue verbi, es isch etz 12:07 und es macht sich es grosses hüngerli bemerkbar. langsam aber sicher chömemer a üseri gränze aber mir händ nehmerqualitäte und lönd üs nöd entmuetige, schliesslich simmer ufeme guete wäg , d’helfti isch gschafft aber es sind no es paar langi streckine vor eus…
12:10 panik bricht uus, e schuelklass stiigt ii, wo isch miin i-pod, schhhhh, aber si schiined guet erzoge z’sii, bis etz..
und au bis am schluss wo sie am goldbrunneplatz uusgschtige sind, am heuried isch fertig. am 12:25 hämmer am heuried de 14-er is triemli gno.
abfahrt am triemli 12::32, mir undebräched eusi fahrt vorussichtlich am leueplatz um üüs für die bisherige asträngige z’belohne, s’ziel isch de golosone…
14:18 wiederufnahm vo üsere odysse ufem 14-er am leueplatz, aber zersch mal e kulinarische zwüschebricht. de golosone isch es italienischs restaurant im bankeviertel und es lohnt sich det de buch vollzschla. d’pizzas sind riesig und vorallem uhuere guet, mir händ für 2 persone rund 70 fränkli zahlt, für 2 pizzas mit menusalat, 4 bier und 2 ramazzottis, da chasch nüt sägä. etz simmer uf em wäg nach seebach, de 2-ti teil vo eusere odyssee.
14:42 simmer in seebach acho, hey, da hani mal gwohnt. d’pizzeria sorriso heisst etz pizzeria tomate, wer uf so en bescheuerte name chunnt? me merkt da scho de agglogroove, da werdet gängbängs mit 14-järige durezoge het me vor es paar mönet i de ziitig chäne läse, wenn de 8-er anstatt de 14-er uf seebach wür fahre wäreds denn gängbängs mit 8-järi…sorry… 😉
14:48, d’reis gaht wiiter mit em 14-er bis zum bahnhof oerlike oscht, d’dago bar, det wo de fraumünsterraub planed worde isch gits übrigens au nümm, aber nach dere krise und bi dene boni wo me hütt so usschüttet gits wahrschinli niened meh soviel z’hole und darum het me de lade dicht gmacht…
14:59 de 10-er richtig flughafe nämemer nur, damit mir au mit dere linie mindestens eimal gfahre sind. uf stadtgebiet gits kei einzigi haltestell wo de 10-er für sich allei in aspruch neh cha. hey! das weiss nöd jede! am glattpark stiiget mir uf de 11-er richtig auzelg um, da usse chunnsch dr vor wie ufem land. und da gits wahrschinli au es unikum vom ganze stadtgebiet: en bahnübergang mit schranke fürs tram.
15:10 de 11-er richtig rehalp isch eusi 2-letschti vollständigi strecki, liecht am ändi vom tunnel. leider hämmer ke glück gha und es het nöd es berner comnino tram uf eus gwarted, ich bin mir aber au nöd sicher öb das tram überhaupt no uf de zürcher schine fahrt. *isch es nöd, nur bis afangs april du tramfahrer du* [anm. d. red.]
15:30 mir sind grad am buecheggplatz duregfahre, müetere mit chinderwäge gits ets fascht i jedem tram, und langsam dörfti de scheiss echli schneller verbi gah mal ändli verbi sii, ich han langsam blatere am arsch. übrigens sind cobras härter als tram2000, das mues me wüsse!
so, d’strecki vom schaffhuserplatz bis zum bellevue hämmer hüt scho es paar mal gseh, irgendwie stiigt da echli die inneri agression, ich chas bald nümm gseh. d’yuppies sind nonig vom schaffe cho, isch ja klar wenns ersch am 8:30 afönd schaffe. am 16:02 isch d’endstation vom 11-er i de rehalp erreicht. am 16:07 gahts wieder zrugg richtig chrüüzplatz.
am chrüüzplatz wird am 16:20 de 15-er richtig klusplatz gno, und d’lüüt lueged etz no komischer weni mi vor de tafele fötele, was luegsch? wotsch miis fetli ha? d’haltestell englischviertelstrasse wird nur vom 15-er durfahre, deshalb isch die linie as absoluts muss, aber mir fahred si nur bis an klusplatz, wo mir am 16:24 achömed, zum letschte mal nämed mer da e linie und fahred demit quer dur die ganzi stadt.
am 16:26 nämemer s’letschte mal alauf, es langed langsam! de 3-er richtig albisriede isch die 3. letschti linie uf üserer f***-stadtrundfahrt, ich han langsam, moment, was langsam? ich han e hornhuut am arsch!
16:37 bling, information der züri linie, scho wieder schweiss uf de stirn, sechseläuten am bellevue, wieder schwein gha. bis etz schiiints überall rund z’laufe uf em zürcher tramnetz. etz am bahnhof stiiget wieder massehaft lüüt is tram iih, fiirabig, isch ja klar…
16:45 churzfrischtigi planänderig, am stauffacher stiigemer uf de achter richtig hardplatz um, anderi gägende anderi lüüt uf de strass, das merkt me vorallem zu de stossziite. vom hardplatz fahred mer zrugg bis an bahnhof selnau, und vo det wieder zrugg an stauffacher. am bahnhof selnau fahrt nur de 8-er dure, sis is iggstriimli importänt! darum simmer det schnäll go chäre.
also hämmer eusi fahrt mit dem 3-er underbroche, mir stiiget am stauffacher weider i und fahred nach albisriede zunere kollegin, es glesli wii go trinke. nach anderhalb stund ändlich die letschti etappe, zersch gönnemer eus aber en kebap vom new-point am albisriederplatz. und etz chunt s’2-er tram, ich han i mim läbe no nie so nes schöns 2-er tram gseh. de farbhof chunnt immer nöcher und circa am 19:30 hämmers gschafft! imene tag simmer alli tramhaltestelle vo züri abgfahre und händ jedi tramlinie mindestens eimal bruucht…so geil, und weisch was, es git wahrschinli niemer wo a dem tag alli tramhaltestelle gseh het, nur ich und mis müüsli, es-isch-e-so!
blockhuus am hechtplatz
Mittwoch, April 7th, 2010es isch wieder mal ziit für es echts highlight a derä stell. im blockhuus am hechtplatz wird konstant top qualität gliferet, e richtigi gnusshöhli a beschter lag. tartar isch de klassiker, das gits in mehrere variatone, mini leibspeise isch s’tartar mit aglio, olio, cipolla e peperoncini, e echti wucht! im blockhuus fühlt me sich pudeliwohl, d’bedienig isch ufmerksam, temperamentvoll und nie um en lockere spruch verläge. bezüglich wii und spirituose findet me da uusgwogeni und riichhaltigi uswahl. zum glück isch das restaurant eis vo de lieblingsort vo minere charmante begleitig, so findet sich immer e uusred um gschwind is blockhuus go cherä, esischeso!
durch den monsun…
Samstag, April 3rd, 2010…ferrari hets gliich immer nonig glernt. das gits ja gar nöd, in malaysia schiffets nun mal sehr oft und bi räge wird e f1-strecki nöd schnäller, gopferteli nomal. etz warted millioneschwäri top-fahrer berate dur top ingenieure 10 minute i de box währeddem d’underdogs feucht-fröhlich ihri rundine drähed. und wo sich die rote ändlich entscheided uf strecki z’gah wärs besser es gummiboot anstatt es f1-auto underem arsch z’ha. und so started morn die beide rote vo 19 und 21, suuuupper, mann, gits gar nöd, scheisse nomal, esischeso!