…formel 1 wältmeischter 2010. und irgendwie werd ich s’gfühl nöd los, dass die rote sich eifach verspekuliert händ. de boxestopp vom alonso isch nur duregfüehrt worde will me uf de webber glueget het, und debi het me die russischi rakete petrov überseh, und schwupp, isch de titel weg. e absolut geili f1-saison isch verbii und am schluss gwünnt eine wos definitiv au verdient het. und e chline wermuetstropfe gits für mich, die leidigi diskussion um stallorder in hockeheim isch so vom tisch und gwunne het es absolut sportlichs team, punkt! esischeso, das mues au mal gseit werde…
de vettel hets gschafft…
November 14th, 2010druide
Oktober 3rd, 2010s’druidetum isch in ängland als religion anerkännt worde, das hani hüt i dr nzz am sunntig gläse, so wiit so guet. de einzig druid woni kenn isch de miraculix, aber der isch ja bi de gallier. anyway, churz über de kanal gschwumme isch me ja glii mal in ängland. also ab jetzt werdet druide behandlet wie alli andere religione. en fortschritt fürd mänschheit? ke ahnig, aber per zuefall lisi grad s’comic ‚die druiden‚, erschine im splitter verlag. das comic isch zämä mit spezialischte entstande um die damaligi ziit möglichscht autenthisch chöne wiederzgeh. d’gschicht spilt am ändi vom 5 jahrhundert. d’chrischte uf dr insle fönd ah sich gedanke z’mache öb doch alles gottbestimmt isch, oder öb de mänsch sälber au chan iifluss neh. s’druidetum staht i derä ziit mit em rugge zur wand, d’druide werdet vo de chrischtliche religion verdrängt. ich möcht eu das comic as härz leggä. es isch en thriller wo inere ziit lang vor üserer ziit spilt. d’spannig zwüsched de innerchristliche strömige und de tuusig jahr alte druidebrüüch wird guet vermittlet. de zeichnigsstil isch zimlich realistisch und i mine auge vo höcher qualität. da d’druide es zentrals elemänt i derä gschicht sind, findet au episode statt, wo d’brüüch und glaubensgrundsätz vo de druide repräsentieret, also entfüehrige nach avalon inklusive. ob dur das, das z druidetum etz in ängland als religion anerkännt isch, sich d’situation vo de druide würklich verbesseret sei dahingestellt. aber dass das comic läsenswert isch und es guets bild vo de druide vermittlet, da dezue chani nur säge: esischeso!
singapur traumhaft statt traumatisch
September 26th, 2010für eimal ischs ränne in singapur vomene rote sieg krönt worde. ich liide immerno under em trauma vo 2008, wo de massa i füerig liegend bim tankstopp de tankschluch mitgrisse het. es paar rundine später het de kimi s’auto bim singapur sling id wand gschtellt. letschts jahr hani s’ränne ganz verpasst, was nöd ganz so, aber immerno traumatisch xi isch. und etz das, de fönsi git alles und gwünnt es langs und härts ränne. dasmal kes trauma sondern en traum in rot, esischeso!
schwarzi schwän
September 22nd, 2010sälte hani es buech so ghasst und gliichziitig gliebt wie de schwarzi schwan vom nassim nicholas taleb. i vielne bereich wird mir das buech für immer verschlosse bliibe, sini philosophische asätz sind zum teil eifach z’höch für min bescheidene verstand. cool findi sini skeptischi haltig gegenüber de märkt und all dene fuzzis wo mit gschiide modell sicherheite vorgauklet. wo das herägfüert het hämmer doch ersch grad gmerkt. wieso mir inere immer komplexere wält immer weniger uussage über zuekunft söled chänne mache lüchtet mir wiitgehend i. über wiiti teil vom buech häni sache gläse und debi kes wort verstande und ich bin immer wieder gneigt xi, das buech id wüeschti z’schicke. aber de absoluti höhepunkt isch wortwörtlich im letschte absatz erfolgt. ich bräche wieder mal di goldigi reglä vo dem blog und zitiere: „Stellen SIe sich ein Staubkorn neben einem Planeten vor, der eine Milliarde Mal so gross ist wie die Erde. Dieses Staubkorn repräsentiert die Chance dafür, dass wir geboren werden, der riesige Planet die Chancen dagegen. Deshalb sollten Sie aufhören, sich den Tag durch Kleinigkeiten verderben zu lassen. Seien Sie nicht wie der Undankbare, der ein Schloss geschenkt bekam und sich über den Schimmel im Bad aufregte. Hören Sie auf, dem geschenkten Gaul ins Maul zu schauen – denken Sie daran, dass Sie ein Schwarzer Schwan sind.“ genau das hani mal amene kolleg gseit, der hat das gar nöd guet gfunde, het mir alles wüeschti an grind gworfe, ich läbi ja nöd und ich sig es uhuere a****loch. esisch…uf alli fäll es interessants buech, esischeso! 😉
fertig super!
September 1st, 2010gmeint sind superheldecomics, es ist vollbracht! ich bin wieder topaktuell! was monatlich usechunt bini wider völlig a schur 😉 us dem grund hani zur abwächslich mal i mini „chaufi und lisi dänn emäl“ chischte glanged und debi isch folgendes usecho…berlin am ändi vo de 20ger jahr, das isch z’thema vo „berlin“ vom jason lutes (link zur läseprob) (nur für „nicht facebook leser“, det funktioniert de link nämli nöd, warum? bö, weiss nöd, esischwohleifacheso… also berlin isch läsenswert, e verfüehrig is berlin zwüsched de beide wältchrieg, technologie wo ufchunnt, uufbruchstimmig und wertekampf dur alli schichte, das isch berlin, ziends eu mal ine.
dänn hani no (link->“heute ist der letzte tag vom rest deines lebens“ <-link) vo de ulli lust (kei witz, die heisst eso) verschlunge. e 450 siitige schunke, scho di beide berlin bänd sind zämä 450 siite xi, krass gäll…! de zeichnigsstil isch chli gwöhnigsbedürftig, me isch isch scho fascht gneigt z säge „speziell“. aber d gschicht derhinder isch echt, also nix pipifax sondern true life. e trip vo 2 punkgirls i de 80er jahr vo wien uf palermo, und ich säge eu, die italos du, das sind denn souhüng, esischeso 😉
e vorentscheidig…
August 29th, 2010es het nöd sölle guet cho, hüt in spa. vo 5 fahrer wo innerhalb vo 20 pünkt um de titel fahred, sind in spa 3 punktelos blibe und di andere 2 holed z maximum, platz 1 und 2 use. de hamilton übernimmt wieder d füehrig i de wm, de alonso het nümm 20 sondern 41 pünkt rückstand, es isch also scho besser gstande für die rote. esischeso!
es git nüt wos nöd git…
August 23rd, 2010…das hani dänckt woni de GEO (erschts vollständig gross gschribnigs wort i dem blog!) artikel über promenadologie gläse han. uf tüütsch heissts spaziergangswüsseschaft (zum blog), also es git tatsächlich e wüsseschaft, wo sich mit em spaziere beschäftigt, sache gits! aber i de ziit vo billigflüger, gps und internet gits wohl es bedürfnis use zfinde, was es bruucht um d’landschaft um eim ume würklich wahrzneh. bedänklich das es eim gar nöd bewusst isch, wie mir durs läbe hetzed, aber zum glück gits so gschiiidi lüüt wos eim vor auge füehred, esischeso!
das isch diis problem!
August 7th, 2010ich han scho s einte oder andere über s restaurant birchegg ghört, aber me mues es erläbt ha, süsch glaubsch es nöd. also reserviert hämmer uf di sächsi, am 10 ab im birchegg acho isch ke sau ume xi. also simmer dusse bi de garte terrasse heräghocket und händ gwartet. so nach 10 minute chunnt de chef. luegt üüs grimmig ah und lauft mürrisch a eus verbii. churz spöter chunnt er mit 2 aperogetränk wo mir nöd bschtellt händ a euse tisch und fraget unfründlich: „warted ihr uf öppis?“, stellt d gläser herä und lauft wieder weg. mir trinked de apero und gönd langsam ine. dänn warted mir druf, das er eus euse tisch zeiget. „hine links, herähocke!“ zischt er. mir nämed platz, ich grad im eggä a de wand. aber das passt em cheff nöd! „platz wächsle“, ich probier echli mit ihm z’pläuderla, sini antwort „das isch diis problem, platz wächsle, d frau sitzt det!“. „ässed ihr alles?“, d antwort isch „ja“, dänn chunnt en täller antipasti mit villne italienische spezialitäte, absolut lecker isch das xi. übrigens au der hämmer nöd bschtellt. genau so wi de wii und s’wasser. als nächschts git es tris vo steipilzrisotto, lasagne und ricottatortelloni, alles vorzüglich zuebereitet. echli gwöhnigsbedürftig für eusi verhältnis isch de salat xi, au der sehr fein, aber irgendwie hämmer das a dere stell nöd erwartet, wil mir de salat au nöd bschtellt händ. langsam recht satt, chunnt de cheff und fraget: „händer luscht uf fleisch, fisch oder chalbsläberli?“, mini begleitig fraget, „was isch für fleisch“ und das isch en fähler xi. zimmli gnärvt butzt er si abe, git kei richtigi antwort und zieht devo. eigetli het si wellä säge, dass sie nümm soviel mag. si ninnt fleisch ich fisch. churz druf abe chunnt de täller, wie bschtellt und er isch sogar echli fründlich und seit „c’est pas boucoup“, au de gang isch vorzüglich xi. bevor de kaffi, wo mir au nöd bschtellt händ, serviert wird, gits no es hervorragends früchtedessert. nachdem mir ja doch es paar mal vom cheff abe putzt worde sind, hämmer üs fasch nöd getraut nach de rächnig z frage. aber binere günschtige glägeheit, hanis doch gschafft in a euse tisch z locke. uf min hiiwiis, das mir langsam hei möchtet zischt er wiedermal „das isch diis problem“, aber er chunnt drufabe mit dr rächnig. das mannli chunnt aus us de gliiche gägend wie ich us italie, bim usegah hämmer no es paar wort gwächslet und det het er sich doch ganz fründlich zeiget, de michele. di ganzi art wie er siis restaurant füehrt isch konzept. es git was er bringt, du zahlsch was er seit, frage sind nöd erlaubt. de priis isch meh als fair und alli gäng sind hervorragend xi. dr dame het er no e rose id hand druckt. leider wird de michele nächscht märz uufhöre, aber mir wärdet sicher no eimal ineluege, esischeso!
tschingg
August 7th, 2010in oerlike a de schaffhuserstrass drüü füf drüü, det isch de tschingg. kes restaurant im eigetliche sinn, eher en take away. es git pasta im take away und im lade verschiedeni italienischi spezialitäte. pasta gits i drüü verschiedene portione, di mittleri (normal) gits für nüün stutz und für mich langed das beschtens. letscht mal hets pasta mitere rüeblicreme und bluemechol geh, für mini begriff zimli exotisch aber es het gschmöckt. standardmässig gits pasta mit sugo oder pesto und immer zwei variatione mit saisonalem gmües. und di gueti nachricht isch, dass es bald im oberdorf au en tschingg git, irgendwie hani sgfühl, dass ich det öfters sii wird, esischeso!
klar, de massa hetti de sieg verdiänt…
Juli 26th, 2010…aber er het doch sälber gseit, dass er im fall der fälle für de fönsi fahrt. de sport isch geschter sicherlich uf de strecki blibe, im wahrsten sinne des wortes. vili meinet de massa sig dur die aktion definitiv zur nummer 2 degradiert worde, das glaub ich hingäge nöd. d’situation i de fahrer wm isch klar, de massa wird de rückstand chum ufhole. zudem het de fönsi (leider) bisher di besseri falle gmacht. ich bin en massa fan, für die wos nonig gmerkt händ. wieso das sie aber geschter sones theater abzoge händ chani mir nöd erkläre. aber irgend e absicht steckt dehinder. klar uf der einte siite d’situation i de fahrer wm, aber das hettis nöd nötig gmacht de platzwächsel so offesichtlich vor de versammelte wältöffentlichkeit z kommuniziere. was steckt also dehinder? ich chönnti mir no vorstellä, dass hinder derä provokation s teamorder verbot varballhornt söll werdä. es isch ja au e scheiss reglä. und d’situation isch nur beschränkt mit 2002, dem jahr mit em „rubens, let michael pass for the championship“-skandal. es isch s 6-te ränne im kalender gsi, de schumi het 4 vo 5 ränne gwunne gha und mit über 20 pünkt vorsprung d’wältmeischterschaft agfüert. es isch also grad emal en drittel vo de wältmeischterschaft verbi gsi und de schumi hetti dur de 2. platz ken grosse schade erlitte. aber etz simmer über d’saisonmitti, ferrari het i de letschte 2 ränne vor hockeheim grad mal 4 vo 86 mögliche pünkt gholt. also d’situation isch ernscht, und das legitimiert us minere sich die (leider) unsportlichi entscheidig, aber wieso die das so offesichtlich mached und dänn so tüend als ob nüt xi wär? kei ahnig, piinlich, aber esischeso!